Qaseeda e Meraj | Woh sarwar e kishwar e Risalat

Share:
Qaseeda e Meraj | Woh sarwar e kishwar e Risalat

This Kalam E Raza is written by Imam E Ishqo Mohabbat Hazrat Imam Ahmed Raza Khan Fazile Bareli Rahmatullah Alaihi, on the auspicious occasion of Shab E Meraj describging the Meraj of Huzur Muhamad Salallahu Alaihi Wa Salam


Qaseeda e Meraj | Woh sarwar e kishwar e Risalat

Woh Sarwar e kishwar e Risaalat jo arsh par jalwah gar huwe the
Naye niraale tarab ke saamaan Arab ke mehmaan ke liye the.

Bahaar hai shaadiyaan mubaarak chaman ko aabaadiyaan mubaarak
Malak falak apni apni lai mein
yeh ghur anaa dil ka bolte the.

Wahaan falak par yahaan zameen mein
rachi thi shaadi machi thi dhoomein,
Udhar se anwaar haste aate
idhar se naf-haath uth rahe the.

Yeh chhoot padti thi unke rukh ki ke arsh tak chaandni thi chhatki,
Woh raat kya jagmagaa rahi thi jagah jagah nasb aaine the.

Nayi dulhan ki phaban mein Kaaba nikhar ke sanwra sanwar ke nikhra,
Hajar ke sadqe qamar ke ek til
mein rang laakhon banao ke the.

Nazar mein dulha ke pyare jalwe hayaa se mehraab sar jhukaaye,
Siyaah parde ke munh par aanchal tajalliye zaat e bahat se the.

Khushi ke baadal umand ke aaye dilon ke taa'oos rang laaye,
Woh naghma e naat ka samaa tha Haram ko khud wajd aa rahe the

Yeh jhooma Mizaab e zar ka jhoomar ke aa raha kaan par dhalak kar
Phuhaar barsi to moti jhad kar Hateem ki goad mein bhare the.

Dulhan ki khushbu se mast kapde naseem e gustaakh aanchalon se,
Gilaaf e mushkeen jo udh raha tha ghazaal naafe basaa rahe  the.

Pahaadiyon ka woh husn e Taz’ee woh oonchi choti woh naazo tamqeen,
Saba se sabzah mein lehrein aati dupatte dhaani chune huwe the.

Naha ke nehron ne woh chamakta libaas aabe rawaan ka pehna
Ki mauj e chadiyaan thi dhaar lachka habaab e taabaan ke thal take the.

Puraana purdaag malgaja tha utha diya farsh chaandni ka
Hujoom e taare nigah se koson qadam qadam farsh baadle the.

Gubaar ban kar nisaar jaayein kahaan ab us reh guzar ko paayein,
Hamare dil hooriyon ki aankhein farishton ke par jahaan biche the.

Khuda hi de sabr jaan e purgam dikhaun kyun kar tujhe woh a’alam
Jab Unko jhurmut mein leke qudsi jinaa ka dulha banaa rahe the.

Utaar kar Unke rukh ka sadqa yeh noor ka bat raha tha bada
Ke chaand suraj machal machal kar jabeen ki khairaat maangte the.

Wohi to ab tak chalak raha hai wohi to joban tapak raha hai,
Nahaane me jo gira tha paani katore taaron ne bhar liye the.

Bacha jo talwon ka unke dhowan bana woh Jannat ka rang o rogan,
Jinhon ne dulha ki paayi utran woh phool gulzaar e noor ke the.

Khabar yeh tehweele mahr ki thi ke rut suhaani ghadi phiregi,
Wahan ki poshaak zebe tan ki yahaan ka joda badha chuke the.

Tajalliy e haq ka sehra sar par salaat o tasleem ki nichaawar
Do roya qudsi pare jamaakar 
khade salaami ke waaste the.

Jo hum bhi waan hote khaaq e gulshan lipat ke qadmon se lete utran,
Magar karein kya naseeb mein to yeh naamuraadi ke din likhe the.

Abhi na aaye the pusht e zeen tak ke sar hui maghfirat ki shillak
Sadaa shafa’at ne di mubaarak! gunaah mastaana jhoomte the.

Ajab na tha rakhsh ka chamakna gazaal e dam khurdasa bhadakna,
Shuaaein bukke udha rahi thi tadapte ankhon pe saaieqe the.

Hujoom e ummeed hai ghataaon muraadein de kar inhein hataao,
Adab ki baagein liye badhaao malaaika me yeh gal gale the.

Uthi jo garde rahe munawwar woh noor barsa ke raaste bhar
Ghire the baadal bhare the jal thal umand ke jungle ubal rahe the.

Sitam kiya kaisi mat kati thi 
Qamar woh khaak unke reh guzar ki,
Utha na laaya ke malte malte
ye daag sab dekhta mite the

Buraaq ke naqshe sum ke sadqe woh gul khilaaye ke saare raste,
Mehakte gulban lehakte gulshan hare bhare lahlaha rahe the

Namaaz e Aqsa mein tha yehi sirr ayaan hon ma’ani e awwal aakhir,
Ke dast basta hain peeche haazir
jo saltanat aage kar gaye the.

Yeh unki aamad ka dab-daba tha nikhaar har shai ka ho raha tha,
Nujoom o aflaak jaam o mina ujaalte the khangaalte the.

Niqaab ulte woh mehr e anwar jalaal e rukhsaar garmiyon par
Falak ko haibat se tap chadhi thi tapakte anjum ke aable the

Yeh joshishe noor ka asar tha ke aabe gauhar kamar kamar tha
Safaaye rah se phisal phisal kar sitaare qadmon pe laut’te the.

Badha ye lehra ke behr e wahdat ke dhul gaya naame rege kasrat,
Falak ke teelon ki kya haqeeqat
yeh arsh o kursi do bulbule the.

Woh zille rehmat woh rukh ke jalwe ke taare chupte na khilne paate
Sunehri zarbaaft oodi atlas
yeh thaan sab dhoop chaaun ke the.

Chala woh sarve chamaañ khiraamaa na ruk saka sidra se bhi  daamaan,
Palak jhapakti rahi woh kab ke
sab eeno aan se guzar chuke the.

Jhalak si ek qudsiyon par aayi hawaa bhi daaman ki phir na paayi,
Sawaari dulha ki door pohonchi baraat mein hosh hi gaye the.

Thake the roohul ameen ke baazu chuta woh daaman kahaan woh pehlu,
Rikaab chooti ummeed tooti
nigaah e hasrat ke walwale the.

Ravish ki garmi ko jis ne socha dimaag se ek bhabooka phoota,
Khirad ke jungle mein phool chamka dahar dahar ped jal rahe the.

Jilo mein jo murge aql ude the
ajab bure haalon girte padte,
Woh sidrah hi par rahe the thak kar chadha tha dam tewar aagaye the.

Qavi the murgaan e wahm ke par
ude to udne ko aur dam bhar,
Utha’ee seene ki aisi thokar
Ke khoone andesha thookte the.

Suna yeh itne mein arsh e haq ne ke le mubaarak hoñ taaj wale,
Wohi qadam khair se phir aaye
jo pehle taj e sharaf tire the.

Yeh sunke bekhud pukaar utha nisaar jaun kahaan hain Aaqa,
Phir unke talwon ka paun bosa
yeh meri aankhon ke din phire the.

Jhuka tha mujre ko arsh e aala gire the sajde me bazme bala
Yeh aankhen qadmon se mal raha tha woh gird qurbaan ho rahe the

Ziyaaein kuch arsh par yeh aayiñ ke saari qindeelein jhilmilaayeen,
Huzoor e khurshid kya chamakte chiraag munh apna dekhte the.

Yehi samaan tha ke paike rehmat khabar yeh laaya ke chaliye Hazrat,
Tumhari khaatir kushada hain jo kaleem par band raaste the.

Badh aye MUHAMMAD qareeñ ho AHMED qareeb aa SARWAR e MUMAJJAD
Nisaar jaun yeh kya nida thi
yeh kya samaan tha yeh kya maze the.

Tabaarakallah shaan teri tujhi ko zeba hai be-niyaazi,
Kahin to woh josh e lan-taraani kahin taqaaze visaal ke the.

Khirad se keh do ke sar jhuka le gumaañ se guzre guzarne wale,
Pade hain yaañ khud jahat ko laale kise bataaye kidhar gaye the.

Suraag e aino mataa kahaan tha nishaan e kaifo ila kahan tha,
Na koi raahi na koi saathi
na sang e manzil na marhale the.

Udhar se paiham taqaaze aana idhar tha mushkil qadam badhaana
Jalaal o haibat ka saamna tha jamaalo rehmat ubhaarte the.

Badhe  to lekin jhi-jhakte darte hayaa se jhukte adab se rukte
Jo qurb unhi ki ravish pe rakhte
to laakhon manzil ke faasile the

Par unka badhna to naam ko tha haqeeq’tan fail tha udhar ka,
Tanazzulon mein taraqqi afzaa dana-tadalla ke silsile the.

Huwa na aakhir ke ek bajra tamawwuje bahre hu mein ubhra
Danaa ki godi mein unko lekar fanaa ke langar utha diye the.

Kise mile ghaat ka kinaara kidhar se guzra kahan utaara
Bhara jo misle nazar taraara
woh apni aankhon se khud chupe the.

Uthe jo Qasre danaa ke parde koi khabar de to kya khabar de
Wahaan to ja hi nahin dui ki
na keh ke woh bhi na the are the.

Woh baag kuch aisa rang laaya ke guncha o gul ka farq uthaaya
Girah mein kaliyon ki baag phoole gulon ke tukme lage hue the

Muheeto markaz mein farq mushkil rahe na faasil khutoot e waasil,
Kamaaneiñ hairat mein sar jhukaaye ajeeb chakkar mein daa’ire the.

Hijaab uthne mein laakhon parde har ek parde mein laakhon jalwe
Ajab ghadi thi ke wasl o furqat janam ke bichde gale mile the.

Zabaanein sookhi dikha ke maujein tadap rahi thiñ ke paani paayein,
Bhanwar ko yeh zaufe tishnagi tha ke halqe aankhon mein pad gaye the.

Wohi hai awwal wohi hai aakhir wohi hai baatin wohi hai zaahir
Usi ke jalwe usi se milne
usi se uski taraf gaye the.

Kamaan e imkaañ ke jhoote nuqto tum awwal aakhir ke pher mein ho
Muheet ki chaal se to poocho kidhar se aaye kidhar gaye the.

Udhar se theeñ nazre shah namaazein idhar se inaam e khusravi mein
Salaam o Rehmat ke haar gundh kar
guloo e pur noor mein pade the.

Zabaan ko intezaar e guftan to gosh ko hasrat e shuneedan,
Yahaan jo kehna tha keh liya tha
Jo baat sun’ni thi sun chuke the.

Woh burj e bat-ha ka maahpaara bahisht ki sair ko Sidhaara
Chamak pe tha khuld ka sitaara ke us qamar ke qadam gaye the.

Suroor e maqdam ki roshni thi ke taabishon se mahe arab ki,
Jina ke gulshan the jhaad farshi
jo phool the sab kanwal bane the.

Tarab ki naazish ke haan lachakiye adab woh bandish ke hil na sakiye,
Yeh josh e ziddain tha keh paude kashaa kashe arrah ke tale the.

Khuda ki qudrat ke chaand Haq ke karoron manzil mein jalwa kar ke,
Abhi na taaron ki chaaun badli
Ke noor ke tadke aa liye the.

Nabi E Rehmat Shafi E Ummat RAZA pe Lillaah ho inaayat,
Use bhi un khil’aton se hissa
jo khaas rehmat ke waan bate the

Sanaa e Sarkaar hai wazeefa qubool Sarkaar hai tamanna,
Na shairi ki hawas na parwaa
Rawi thi kya kaise qaafiye the...

SUBHANALLAH....

No comments